ಬೇವು ಬೆಲ್ಲದೊಳಿಡಲೇನು ಫಲಾ
ಹಾವಿಗೆ ಹಾಲೆರದರೇನು ಫಲಾ ||
ಕುಟಿಲವ ಬಿಡದಿಹ ಕುಜನರು ಮಂತ್ರವ ,
ಪಠನೆಯ ಮಾಡಿದರೇನು ಫಲ|
ಸಟೆಯನ್ನಾಡುವ ಮನುಜರ ಮನದಲಿ,
ವಿಠಲನ ನೆನೆದರೆ ಏನು ಫಲಾ ||
ಕಪಟತನದಿ ವಂಚಿಸುವ ಮನುಜರು ,
ಜಪಗಳ ಮಾಡಿದರೆ ಏನು ಫಲಾ |
ಕುಪಿತ ಬುದ್ಧಿಯನು ತ್ಯಜಿಸದೆ ನಿತ್ಯದಿ ,
ಉಪವಾಸ ಇದ್ದರೆ ಇನ್ನೇನು ಫಲಾ ||
ಮಾತಾ – ಪಿತರನು ಬಳಲಿಸುವಾ ಮಗ ,
ಯಾತ್ರೆಯ ಮಾಡಿದರೇನು ಫಲಾ |
ಘಾತಕ ತನವನು ಬಿಡದೆ ನಿರಂತರ ,
ಗೀತೆಯನೋದಿದರೇನು ಫಲಾ ||
ಪತಿಯನು ನಿಂದಿಸಿ ಬೊಗಳುವ ಸತಿಯರು ,
ವ್ರತಗಳ ಮಾಡಿದರೇನು ಫಲ |
ಅತಿಥಿಗಳ ಎಡೆಯಲಿ ಭೇದವ ಮಾಡುತ ,
ಗತಿಯನು ಬಯಸಿದರೆ ಏನು ಫಲಾ ||
ಹೀನ ಕೃತ್ಯಗಳ ಮಾಡುತ ನದಿಯಲಿ ,
ಸ್ನಾನವ ಮಾಡಿದರೇನು ಫಲಾ |
ಶ್ರೀನಿಧಿ ಪುರಂದರ ವಿಠಲನ ನೆನೆಯದೆ ,
ಮೌನವ ಮಾಡಿದರೇನು ಫಲಾ ||
Lyrics in English
Bevu belladolidalenu phala havige haleredenu phala ||
Kutilava bidadiha kujanaru mantrava pataneya madidarenu phala |
Sateyannaaduva manujara manadali vittalana nenedare enu phala ||
Kapatatanadi vanchisuva manujaru japagala maadidare enu phala |kupita buddhiyanu tyajisade nityadi upavasaviddarenu phala||
Mata pitaranu balalisuva maga yatreya madidarenu phala |
ghatakatanavanu bidade nirantara geeteyanodidarenu phala ||
Patiyanu nindisi bogaluva satiyaru vratagala madidarenu phala |
atithigaledeyali bhedava maduta gatiyanu bayasidarenu phala ||
Hina krutyangala maduta nadiyali snanava madidarenu phala |
shrinidhi purandara vittalana neneyade maunava madidarenu phala ||